Orkusparandi eplakóking

Fríggjadagur 15. apríl 2011 - 16:39

Flest allir føroyingar kóka eplir hvønn dag. Kóka vit eplini á orkusparandi hátt, kunnu vit bæði minka um útlátið av Co2 og um útlátið av krónum úr mappuni.

Nógvir føroyingar kóka eplini við nógvum hita í úti við trý kortér, men tað er als ikki neyðugt.

Tá tú hevur vaskað eplini í køldum vatni, oysir tú ein fullan el-ketil av kókandi vatni yvir og skrúvar for frá. Tá tey eru komin upp á kók aftur, skulu tey kóka hart í eitt kortér, og so sløkkir tú undir plátuni. Lat nú grýtuna standa í ein hálvan tíma ella so, og eplini eru perfekt, føst og góð.

Tú kanst eisini bara líka lata eplini koma upp á kók í 5 minuttir, taka grýtuna av hitanum og balla hana í dýnuna. So standa tey og kóka liðugt, meðan tit fara í kirkju ella okkurt heilt annað.

Hatta við at lata salt í eplavatnið, eru ymiskar meiningar um. Sjálv smakki eg ongan mun, men her eru fólk helst ymisk á máli.

Les eisini